3Jo | ASO | STEP |

ZOHANE' GIZINE' LUHUVO NITE' NABA 3

3 John

Gaio'ni Luhuvo Nite' Gize Imine' Gamazi

1 Zogone lamine' Gaio gaza lu'ne gimuve make, gizebo ve naza luhuvo nite' nogize gimuze. Ningezo.

2 Zogone, luka do lamine' ogo nanivo okongasi a'mine'mine ogo ha lamine' minavo minevo' alevoka laminekovo' o-do vo minelive lo O'mosola laa' nouve. 3 Leze zuho malite igi gamazi gihile'mi akalo' vaa' nane li ido' gamazi gihile do gili' lo minaa' nane li gei' monovoka li soto' igi li-nimikevo mulu'neu' lamine' goloso gelo minuvoni' ve. 4 Inite' ne'mine mana'mine initekumu' mulu'neu' lamine' geleloni'za neni' izipaha'ne zuho gamazi gihile'mi akalo' vaa' nave li likevo gelo ato' nitekumu' lamine' gelaa' nouvoni' nene ivile' ogo mulu'neu' lamine' goloso gelaa' nouve.

Gaio' Gono Lamine' Davo Opo'ni Lani' Gamazi Gizine'

5 Zogone, Gaza leze aleve Izesu' zuho ma venenga ve minanikisi lengita iga' iga' avo ngele'mize lamine' olosa gono daa' naine' nene monovo gihile lamine' daa' nane. 6 Luka ngemaningumu' nene a'mine aleve nete Izesu' evenele mulise milangu' li soto' igi gopo'ni laa' nave. Ido' a'ne'mine aleve lengita igi nivavo ma O'moso'mo gelavo lisihe' lamine' ilido' do molo akala vilizangu' inite' ma vise' ilizani' inite' nene do soto' ogo ngemo ngele'mizo viline' nene lamine' oloseive. 7 Ee, Izesu' guvele monelingumu' gono dalone li engi' misubo'ine huli vi Izesu'nimu' gilamavetida gono di engitati' meni disa'manako hize ele' o-ngedeline' nene lamine' o neive. 8 Nemu' nene gamazi gihile di hutile' ilizangu' lazasi gono makato' dune' gelavo mineloningumu' ve lo a'ne'mine ve hize ele' o-ngedelone' o neive.

Diotelehe' Monovo've Goloso O Vivo Demetelio' Monovo've Lamine' Miningumu' Gizine' Gamazi

9 Lengi' muliselo' luhuvo nite' ma gizuvoni'za lengi' vovotingu' ve naba lolo' olosa amuzo molaa' ive Diotelehe' aza nene neni' gamazi'ne gele hulaa' neive. 10 Nemu' nene aza oga' ine' initekumu' vo lo soto' ogo eita gamazi gono dalosuve. Lelikumu' gamazi goloso gehepeve lo soza gamazi lo-ledaa' neive. Ido' neevo' nomive. Leze zuho Izesu' aleve ma lengita ngimiselekunivo vi hetelikevo aza mese' aseka lo-ngedesa'mive. Ido' malite mese' aseka lo-ngedelone li lilisa naavo o've lo-ngedo mono' muliseuti' hulo heta o-ngedaa' neive.

11 Zogone lamine, evene' ma goloso nite' di nizavo ma a'mido' nge'metamozo. Inite' lamine' di nizavo ma nelokovo' nge'metezo. Ingine inite' lamine' di minaa' nave nene O'mosolati' soto' ani' ve. Ido' ingine goloso nite' di minaa' nave ingine mo O'mosomu' ningi gilamave. 12 Demetelio'nimu' evene' muki' gamangi mili-daa' navo gamazi gihile ne'mosi gamangi molo-daa' neive. Nazasi ezemu' gamangi nomolo-duve. Ido' gamazi laminekovo' noluvoni' nene gele nane.

Evene' nGopo'ni Lo-ngidine' Gamazi

13 Naza gamazi lo-gemeloni' nene muki' ha neine'za gizeso' ga'ne nisamive. 14 Naza gamene ha'na minamo gei' vo ninguvo vetedunu' gamazi lo volelo' melo' ogo minelosive losa noluve. 15 O'moso'mi hongu geita mine'mo vo minelive. Zogole zuho gopo'ni nilave. Ido' zogole zuho a'mida nizani' nene vo lo-ngemezo. Engi' hamo' hamokumu' ngopo'ni noluve. Moda ve.